الجماعه عندنا رقود والباقين شغالين بالقو

[الزعابـي]

الكل يستفسر عن مصير الشارجه وكيف بيرد أقوى من المواسم الخمس الماضيه وكيف ما يتكرر سيناريو كل عام من محاولة الهروب من شبح الدرجه الثانيه

اللعيبه هم نفس اللعيبه بس الاختلاف كان هاي السنه في الثلاثي اللي انضم للفريق: نواف وسيف وصالح بشير واللي قدروا مع البقية يعطون للشارجه شكل ثاني في الدور الثاني

وخلنا نكون واقعيين يوم نقول إن الشارجه لولا الله ولولا توفيق مجلس الشرف في ضم هالثلاثي كنا اللحين نرافق الظفره أو دبي

وفي المواسم الماضيه حاول مجلس الادارة باستيحاء ضم مجموعه من اللعيبه ومن ضمنهم مكتوم عبيد وعبدالله المعلم وطارش من الذيد لكن ما قدروا يضيفون شي للفريق

وكان لتدخل الشيخ عبدالله آل ثاني شخصيا في موضوع نواف وسالم وبشير أكبر الأثر في رفع مستوى الفريق

المهم،

اللي يخليني أتكلم في هالموضوع اليوم هو الخبر اللي وصلني من أن نادي الوصل محطي عينه على أربع لاعبين من أندية الدرجه الثانيه لضمهم لصفوفه وهو تعاقد بالفعل مع لاعب من نادي رأس الخيمه. وتم التعاقد مع عبدالله صقر ليكون من ضمن الجهاز الفني وليقوم شخصيا ابمهة إختيار اللعيبه من الدرجه الثانيه بحكم معرفته الجيده فيهم

ونادي الشباب بدوره قاعد يدور عن لعيبه من نفس الدرجه، هذا عدا عن الهوامير الكبار المعروفين بأكل اليابس والخضر

لكن السؤال اللي يفرض نفسه وبقوه هنيه: وين دور مجلس الشرف من هاي السالفه؟؟
وليش ما يتحركون الجماعه من اللحين لأن الكل فطن لوجود مواهب ممتازه في الدرجه الثانيه

لازم الجماعه يبادرون من اللحين لأن الفريق ناقصه وايد وبالذات في خط الدفاع

وقد أعذر من أنذر

[شرجاوي وبس]

سؤال وجيه..

وينهم؟؟

الله اعلم..

بخصوص إدارة الوصل فعبدالله حارب يصير لي ، ولاحظت عليه ذهابه لأندية الدرجة الثانية بين فترة وأخرى. والصراحه هذا تحرك جيد منه بس وين اللي يفكرون. رئيس مجلس إدارة الوصل بنفسه يذهب لأندية الدرجة الثانيه بشكل مستمر دون الحاجة إلى وسيط..

[الزعيم الشرجاوي]

أتوقع أن الإدارة قاعدة تركز جهودها على بقاء نواف وصالح وعلى شراء حارس مرمى

أتمنى البحث عن مدافع أيمن

وشكرا

[الــخـيـّـال]

الأخ madmax

أحب أشكرك على الموضوع اللي يبحث ايجاد حل مناسب للأزمة اللي تقول عنها ..

وبخصوص العنوان !!
اتمنى انك تغيره لأن كلمة رقود مب حلوة وما تليق للإدارة اللي يالسة تسوي المستحيل للفريق الشرجاوي .. وبصفتي انا اقدر اقول ( لا غبار عليهم )

اخوي madmax يمكن الادارة ما تبا العالم يعرف عن تحركاتها .. وما تبا اي حد يعرف شو اللي يستوي في الفترة الحالية !!

اسمحلي اخوي انت ما يحق لك الاساءة ( كلمة رقود ) للإدارة لأنك ما تعرف شو اللي يستوي بالضبط وفي نفس الوقت ما يحق لك تصفهم بالرقود ..

تحياتي

[ا لــصــقــر]

السلام عليكم :

اخوي madmax ادري ان كلامك نابع من غيرتك على شعار النادي بس...

احب ابشرك اني سمعت من الوصلاويه ان النادي يجري محادثات لضم اللاعب الايراني فرهاد مجيدي والله اعلم......

[الزعابـي]

أخوي يوسف

الموضوع ينقرا من عنوانه وأنا عند رايئ في مجلس إدارتنا وما بغيره لأني مقتنع لأنه لولا قدرة ربك وتشريف حاكم البلاد للنادي بتكوين مجلس الشرف اللي بذل جهوده مشهود لها من الكل كان الفريق اليوم يخطط كيف بيرجع للدرجه الأولى من يديد

أنا مقتنع إن مجلس الشرف ماراح يقصر مع النادي وبالذات الشيخ عبدالله والشيخ عصام والشيخ سعود لأنهم عاصروا النادي أيام بطولاته ويعرفون قيمة الفرحة عند الشرجاويه

وكلامي كان للتنبيه والحث على البحث وبسرعه لأن الغير محطي عينه على اللعيبة مب بس نحن

ونصيحه لأخواني في هالمنتدى أتمنى من اللي يسمعون أي خبر عن أي لاعب يحاول النادي ضمه إنهم يخلونه لنفسهم لحد ما تتم الصفقة نهائيا ويوقع اللاعب في صفوف الشارجه وبعدين يبشرونا لأنكم مثل ما تدرون وايدين يتريون الفرص ويدورون عن أسامي يضمونها أو يدشون يخربون

وفي النهايه، أنا ما اغير أي كلمه أقولها لأني قبل ما أكتب أي شي أكون مقتنع فيه ومفكر فيه عدل

وإختلاف الراي ما يفسد للود قضيه

[الــخـيـّـال]

الأخ madmax

أول شي أحب أقولك ان كلامك مب مقنع ومب مفهوم !!

لأنك أول شي قلت الادارة رقود !! للأسف يعني

وعقب قلت هالجملة ( لكن السؤال اللي يفرض نفسه وبقوه هنيه: وين دور مجلس الشرف من هاي السالفه؟؟
وليش ما يتحركون الجماعه من اللحين لأن الكل فطن لوجود مواهب ممتازه في الدرجه الثانيه )

ممكن اعرف انت شو تقصد بالضبط ؟؟

في البداية قلت وين دور مجلس الشرف وعاتبتهم ليش ما يتحركون !! والحين يالس تقول اعرف انهم ما يقصرون ؟؟

اسمحلي الشيخ ترى كلمة ( رقود ) مب في عنوانه كما ذكرت والظاهر انت مب عارف دور الادارة ..

وبعدين كيف انت تكتب هالكلام ( وإختلاف الراي ما يفسد للود قضيه ) وفي نفس الوقت انت تسيئ للادارة وتقول عنهم رقود !!

وعلى فكرة حتى لو انت تنبهم وتحثهم لكن ما توصفهم بالرقود !!

أتمنى قبل لا تكتب أي موضوع انك تراعي هالرجال اللي يبذلون كل ما بوسعهم لتطوير الكرة الشرجاوية ولإعادة البسمة للقلعة البيضاء

تحياتي لك

[البرنس]

انا اقول انه الاداره اكيد فكرة بهذا الموضوع ولا تنسى انك انته بدال ماتشتري لاعب من نادي ثاني بهاي الفلوس تقدر اتجهز فريق تحت 16 سنه لمدة موسم كامل تقريبا ؟؟

فكيف انته تخسر من ميزانية النادي فلوس على لاعب وانته محتاج هاي الفلوس اكثر ..... وبعدين الفلوس الي بتندفع حق لاعب من الدرجه الثانيه ليش ماندفعها مثلا حق جمعه طرار مثلا اذا كان ناقصنك مدافع ايمن انته بهذي الفلوس تقدر اتجهز جمعه طرار ....( مثال هذا )

وتحياتي مراسلكم من الشارقه البرنس

[شرجاوى من دار الحي]

مرحبا بالشباب..

هل باعتقادكم باننا وصلنا لمرحلة البحث
عن لاعبين خارج اسوار النادي ومن اشباه
انديه؟
هل اصبحت الام الشرجاويه عاقرا ولم نشاهد
حتى الان لاعبا يستحق ان يلعب ضمن هذا
النادي؟
هل جار بنا الزمن لهذه الدرجه حتى اصبحت
اغلبية جماهيرنا تطالب بلاعبين لم تلدهم
مدرسة النادي؟
هل النادي الذي انجب جاسم محمد ومبارك بالاسود
وجمعه غريب واستمر ينجب وينجب لنرا بعدهم محسن
مصبح وعيال مير ويوسف حسين والبقيه
عاجزا ام مستبخلا؟
هل باعتقادكم ان لاعبا في احدى اندية القاع ان يعيد
الملك لعرشه؟
وهل وبعد مرور خمس سنوات وبل اكثر من اخر بطوله ومن انهيار
اخر جيل كان مرصعا بالذهب ان نرا لاعبا او نضع املا بناشئ
فيه عرقا شرجاويا خالصا يعيد لنا ارشفة الماضي الرائع
لاعبا يضيئ لنا ولو شمعة في زمن اسود لم نرا فيه
نورا او حتى بارقة امل في زمن اضحى كزمن من جاؤو ورحلوا
ولم يذكرهم احد.
في زمن يحتفل من كان يتمنى ان يصل الى ما وصلنا
اليه
وينافس من كان ناسيا منسيا في غياهب القاع
ويتعملق من كان مجرد فارا صغير او قطه مشرده
وينزل من مستوى تاريخنا وعلو كعبنا من هو بالتاكيد
كان اردى واردى.






ولجميع اخوتي اعضاء منتدى شرجاوي اجمل تحية


--------------------

[ا لـشـمـا لـى]

نرجوا من جميع الاخوة الذين يريدون تنبيه ادارة نادى الشارقة الى قصور معين أو انتقاد خطأ فى عمل الادارة ( من وجهة نظره ) الانتباه الى أن أعضاء مجلس الادارة يبذلون كل مافى وسعهم للارتقاء بالفريق و ازالة كل المعوقات التى من شأنها عدم ظهور الفريق بالمظهر اللائق .. وأن هؤلاء الرجال بمثابة الاخوان الكبار لنا ومن واجبنا احترامهم و تقدير عملهم .. ولا أقصد بهذا الكلام عدم الانتقاد .. ولكن عدم استخدام الكلمات التى قد تحمل اساءة الى شخصيات محترمة.

وايضا لا اقصد الأخ مادماكس .. لاننى ومن متابعتى لمعظم ما كتب هنا وفى منتدى الامارات .. أعرف مدى حبه للفريق وشخصيته البعيدة عن التجريح .. وهو لم يقصد المعنى الحرفى للكلمة بقدر ما أراد من الادارة سرعة التحرك بمواجهة تحركات الاندية الاخرى . وأعجبنى كلامه أو نصيحته للاخوة الاعضاء بعدم نشر كل ما يسمعون ... فليس كل ما نعرفه نكتبه و ليس كل خبر صحيح .. ولم ينشئ هذا المنتدى لنشر اشاعات تضر و لاتنفع .

وأنا اؤيد كلام الأخ يوسف بأن الادارة قد تكون تتحرك بالسر ( وهذا ما نريده ) .. و لايجب الاعلان عن جميع التحركات .. فكم سمعنا بأن نواف سيذهب الى الشعب وأن صالح بشير سيذهب الى الشباب .. ولكن تحركات الادارة اثمرت بتسجيلهم فى كشوفات الشارقة .. وهما الآن من أفضل لاعبى الفريق .

شرجاوى من دار الحى .... كلامك من ذهب .


تحياتى للجميع

[طويل العمر]

الصراحة .. أنا أتفق مع العضو: يوسف عبدالله محمد ..

في تعقيبه على موضوعك أخوي:madmax ..

لأنه مجلس الشرف والادارة .. يعرفون شغلهم ..

وسمعت إنه في نية لإضافة بعض اللعيبة لفرقة النحل ..

وخلونا نصبر عليهم شوي ..

وفي الأول والأخير كلنا نبغي مصلحة النادي ..

والسموحة .. تحياتي ..

[الزعابـي]

أخوي الشمالي

مشكور على ردك اللي قلت فيه معنى كلمة رقود اللي كتبتها واللي ما عجبت البعض

أنا أقصد إن الجماعه ما يتحركون لجلب اللعيبه اللي ممكن يسدون النقص الواضح في خط الدفاع واللي كان من أضعف خطوط الفريق في المواسم الماضيه

وكلمة رقود لها أكثر من مفهوم وهنيه أنا قصدت عدم التحرك وأخذ المبادره وخصوصا ونحن نشوف تحركات أندية ثانيه مثل الوصل والشباب واللي راح تصعب من مهمتنا وتغلي أسعار اللعيبه

وأنا دوم أفرق بين مجلس الادارة ومجلس الشرف لأن دور كل واحد واضح وهذا الشي بين في الأسابيع الأخيرة للدوري

ولازم يعرف الكل إن إنضمام نواف وصالح بشير وسالم سيف كان لمجلس الشرف وخصوصا الشيخ عبدالله آل ثاني الدور الأكبر في تسهيله وتحقيقه

نادي الشارجه عمره ما كان ملك لشخص أو مجموعه من الأشخاص

نادي الشارجه ملك لكل محبيه ومشجعيه

وكلمة الحق لازم ما تزعل أي إنسان